शुक्ला हिलेटारमा साउने सोमवार भगवान शिवको महिमा सहितको सत्संग हुने
दुलेगौंडा, २७ असार । तनहुँको शुक्लागण्डकी–८ स्थित शुक्ला हिलेटार शिवालय क्षेत्रमा साउनको प्रत्येक सोमबार भगवान शिवको महिमा सहितको सत्संग हुने भएको छ ।
संस्थाले विगत ४ वर्षदेखि साउनको सोमवार सत्संग गर्दै आएकोमा यस पटक संगीतमय प्रवचन थप गरिएको उपाध्यक्ष ध्रुवकुमार मल्लले जानकारी दिए । उनले यस क्षेत्रका प्रचार, भक्तजनहरुको आगामनमा वृद्धि र निर्माणाधिन दुग्धेश्वर महादेवको मन्दिर सम्पन्नताका लागि दान मार्फत सहयोग संकलन गर्ने उदेश्य रहेको बताए । उनले शुक्लागण्डकी क्षेत्रका सबैको यस शिवालय क्षेत्रमा सकेको दान संकलन गरि व्यवस्थिथ बनाउने उल्लेख गरे ।
मन्दिर निर्माण उपसमितिका संयोजक ज्ञानप्रसाद भण्डारीले टोलटोलमा पुगेर दाताहरुसँग आर्थिक संकलन भइरहेको बताए । सदस्य विवेक खनालले पुरानो शिवको यस मन्दिरको विस्तारै विकासले बाटो समाउन लागेको बताए । उनका अनुसार हालसम्म कबोलसहित करिव २० लाख रुपैया संकलन भएको छ । पण्डित ऋषिराम पौडेलले शिव महिमा कथा बाचन गर्नेछन् । हिन्दू धर्मशास्त्रमा साउन महिनालाई शिवको अत्यन्त प्रिय महिना रुपमा लिइन्छ । साउनको सोमवार भगवान शिवको महिमा मानिने हुँदा भक्तजन उपासना गरी नजिकको पवित्र नदी, कुण्ड तथा तलाउबाट जल शिवलिंगमा चढाउँदा मनोकांक्षा पूरा हुने धार्मिक विश्वास छ ।
