एसियन गेम्स्का पदक विजेता विमला तामाङ एनआरएन टोलीमा
आसन्न आठौं राष्ट्रिय खेलकुदमा गैर आवसीय नेपाली संघ एनआरएनले विभिन्न नौ खेलमा सहभागीता जनाउने भएको छ । एनआरएनले आज पत्रकार सम्मेलन गर्दै आठौं राष्ट्रिय खेलकुदमा ९ खेलबाट २४ खेलाडीले सहभागिता जनाउने जानकारी दिएको हो ।
कराते, तेक्वान्दो, जुडो, ब्याडमिन्टन, लन टेनिस, टेबल टेनिस, गल्फ, म्याराथन र बक्सिङमा टोलीले प्रतिस्पर्धा गर्ने एनआरएन अध्यक्ष भवन भट्टले बताए । एनआरएन टोलीमा अमेरिका, युएई, मलेसिया, अष्ट्रेलिया, मकाउ, जापान र हङकङ गरी ७ राष्ट्रका गैर आवासीय नेपाली खेलाडीहरुले सहभागीता जनाउने छन् । सन् २०१४ मा भएको एसियन गेम्स्मा नेपालका लागि एक मात्र काँस्य पदक जित्न सफल कराँते खेलाडी विमला तामाङपनि एनआरएनको टोलीमा रहेकी छिन् ।
राष्ट्रिय खेलकुद परिषद् राखेप का सदस्य–सचिव केशवकुमार विष्ट र एनआरएनएका अध्यक्ष भवन भट्टबीच आठौंमा एनआरएन खेलाडीको सहभागिताका लागि फागुनमा सम्झौता भए अनुसार पहिलो पटक राष्ट्रिय खेलकुदमा एनआरएन खेलाडीले सहभागिता जनाउन लागेको हो । आठौं राष्ट्रिय खेलकुद चैत अन्तिम साताबाट हुने बताईए पनि राखेपले केहि दिनमा आधिकारीक मिति घोषणा गर्ने जनाएको छ ।
